Hãy nhìn lại lối sống của bạn.

Zaj tshoob Txais Qaib Npws Poj by Txum Meej

0 12

- Advertisement -

Zaj txais qaib npws poj no mas xib hwb tsis tau qhia. Tus sau tshawb hauv ntawv zaj tshoob uas tau teev tseg los kuj tsis muaj teev cia thiab. Tus sau thiaj li tau tsim zaj nram qab no los siv. Zaj txais qaib npws poj no yog muab txuj lom ntau yam los sib hauj ua ib zag zaj tshoob. Nws muaj 5 nqe li no.

Koj xav paub ntxiv Zaj tshoob Cob Qaib Npws Poj by Tshaj Meej

Nqe 1:

Hais zoo li kus! Chiv phiaj tuaj lawm yuav neb nkawm phooj ywg kwv sis luag. Lag yau neb nquam lis yeev kuv niam kuv txiv tom ub nkawm ncuas tuaj txog kuv niam kuv txiv tsev tom no. Lag yau neb tsis pom qab cob. Neb muab cob lis nkaus rau wb txiv tuam mej koob lwm mej zeeg tej mus quav npab. Lag yau neb yuav khom vam wb coj mus khaws dai lis nkaus rau kuv niam kuv txiv tom no tus ncej nthab.

Lag yau neb nquam lis yeev kuv niam kuv txiv tom ub nkawm ncuas tuaj txog kuv niam kuv txiv tsev tom no. Lag yau neb tsis pom qab cob. Neb muab cob lis nkaus rau wb txiv tuam mej koob lwm mej zeeg tej mus quav tes. Lag yau neb yuav khom vam wb coj mus khaws dai lis nkaus rau kuv niam kuv txiv tom no tus ncej tsev.

Nqe 2:

Tub tsheej mus luj vim luj vim mus ua neb tsaug mog. Lag yau wb yuav muab neb nkawm ncuas coj mus cob lis nkaus rau nkawm nus tij kus nus npaws. Nus tij kus nus npaws yuav coj mus ntxus tawv tsis ntxus to, ntxus tawv to tuaj saum cam. Daus lis voom rau lub yias hlau, ncej yias ces muab taws rau, qaum yias npau lis auv. Daus sis voom rau lub tais xyoob coj mus cob lis nkaus rau kuv niam kuv txim tom no. Kuv niam kuv txiv tes lauj taws tswm ciab, lauj nas taws tswm thuv los hua lis hawv rau nws peb txhis poj yawm los txwv txoob.

Tub tsheej mus luj vim luj vim ua neb tsaug mog. Lag yau wb yuav muab neb nkawm ncuas coj mus cob lis nkaus rau nkawm nus tij kus nus npaws. Nus tij kus nus kwv yuav coj mus ntxus tawv tsis ntxus to, ntxus tawv to tuaj saum cam. Daus lis voom rau lub yias xyoob, ncej yias ces muab taws ncooj, qaum yias npau lis vooj. Daus sis voom rau lub tais ntseej coj mus cob lis nkaus rau kuv niam kuv txim tom no. Kuv niam kuv txiv tes lauj taws tswm ciab, lauj nas taws tswm thuv los hua lis hawv rau nws peb txhis poj yawm los txwv zeej.

Nqe 3:

Kuv niam kuv txiv tsuas txawj npws mus txawj laig, nws yuav laig mus txij caug. Kuv niam kuv txiv tom no peb txhis poj yawm li tau noj txhij mus haus tsau.

Kuv niam kuv txiv tsuas txawj npws mus txawj laig, nws yuav laig mus txij dua. Kuv niam kuv txiv tom no peb txhis poj yawm li tau noj txhij mus haus txhua, no tis yuas neb nkawm phooj ywg kwv sis luag e!

Nqe 4:

Kuv niam kuv txiv tom no nws tsis txawj ua vaj tsev. Nws ua tau lub vaj tsev tuaj nruab roob. Kuv niam kuv txiv tu tsiaj los tsiaj tsis coob.

Kuv niam kuv txiv tom no nws tsis txawj ua vaj tsev. Nws ua tau lub vaj tsev tuaj nruab dawm. Kuv niam kuv txiv tu tsiaj los tsiaj tsis hlaws.

Nqe 5:

Kaj ntug tag kis ntxov kuv niam kuv txiv tom no li nthos lis nkaus niaj peb tiag ntsiab mus w lis liag rov pem roob. Ntshe kuv niam kuv txiv yuav nthos lis nkaus tau niam ib tug coob rau neb coj mus rau kuv niam kuv txiv tom ub npws nws peb txheej peb tis poj yawm txwv koob.

Kaj ntug tag kis ntxov kuv niam kuv txiv tom no li nthos lis nkaus niaj peb tiag ntsiab mus w lis liag rov pem dawm. Ntshe kuv niam kuv txiv yuav nthos lis nkaus tau niam ib tug ncuas rau neb coj mus rau kuv niam kuv txiv tom ub npws nws peb txheej peb tis poj yawm txwv yawm, no tis yuas neb nkawm phooj ywg kwv sis luag e!

Zaj Txais Qaib Npws Poj los xaus li no. Niam txiv kwv tij neej tsa, nej leej twg pom nqe twg zoo txhim kho li cas no thov sau nej lub tswv yim tuaj txhawb nqa tus sau.

Mus kawm ntxiv zaj Zaj tshoob Cob Qaib Npws Poj by Tshaj Meej

- Advertisement -

Để lại bình luận

Địa chỉ email của bạn sẽ không được công bố.

Website này sử dụng Akismet để hạn chế spam. Tìm hiểu bình luận của bạn được duyệt như thế nào.