Hãy nhìn lại lối sống của bạn.

Zaj tshoob Txais Nyiaj (Khaws Nyiaj) by Keeb Yaj

1 10

- Advertisement -

Zaj tshoob Txais Nyiaj (Khaws Nyiaj) xis li pos ua tseg yawm ua cia ces hais li no. Tiam sis, ib sab ntuj ib tsa txuj, yuav muaj ntau qhov txawv raws li koj paub thiab ntawm koj teb chaws. Txawm li cas los peb yuav qhov siv tau xwb.

Koj xav saib ntxiv Zaj tshoob Txais Qaib Npws Poj by Txum Meej

Nqe 1:

Hais zoo li kus! Chiv phiaj tuaj lawm yuas neb nkawm phooj ywg kwv sis luag. Zoo li kuv niam kuv txiv tom ub muab txiv pwj kub cob lis nkaus rau neb tej quav npab neb li sawv kab.

Zoo li kuv niam kuv txiv tom ub muab txiv pwj nyiaj cob lis nkaus rau neb tej quav tes neb li sawv kev.

Nqe 2:

Neb nquam lis yeev txiv pwj kub tuaj txog lawm tej yas kab, ntshe txiv pwj kub yuav tsis rov mus fib qab.

Neb nquam lis yeev txiv pwj nyiaj tuaj txog lawm tej yas kev, ntshe txiv pwj nyiaj yuav tsis rov mus fib tse.

Nqe 3:

Neb nquam lis yeev txiv pwj kub tuaj txog kuv niam kuv txiv tsev tom no, kuv niam kuv txiv yuav txais tau neb ib tug nyuj mus qhuav hlaub, ntshe yuav tuaj saws tsis tau kuv niam kuv txiv tom no tus me ntxhais mus txawj paj ntaub.

Neb nquam lis yeev txiv pwj nyiaj tuaj txog kuv niam kuv txiv tsev tom no, kuv niam kuv txiv yuav txais tau neb ib tug nyuj mus qhuav tawv, ntshe yuav tuaj saws tsis tau kuv niam kuv txiv tom no tus me ntxhais mus txawj ntawv.

Nqe 4:

Neb nquam lis yeev txiv pwj kub tuaj cob lis nkaus rau wb txiv tuam mej koob lwm mej zeeg. Luag tej tub txawj tub ntse luag yuav muab rawg nyiaj rawg kub tais. Lag yau wb yog tub ruag tub u ces wb yuav ua cuag dav ntsaig.

Neb nquam lis yeev txiv pwj nyiaj tuaj cob lis nkaus rau wb txiv tuam mej koob lwm mej zeeg. Luag tej tub txawj tub ntse luag yuav muab rawg nyiaj rawg kub muab. Lag yau wb yog tub ruag tub u ces wb yuav ua cuag dav tsuab.

Nqe 5:

Neb muab txiv pwj kub cob lis nkaus rau wb nkawm phooj ywg kwv sis luag tej mus quav npab, ntshe neb txiv pwj kub quaj nrov qwb qaws tsis rov mus fib qab.

Neb muab txiv pwj nyiaj cob lis nkaus rau wb nkawm phooj ywg kwv sis luag tej mus quav tes, ntshe neb txiv pwj nyiaj quaj nrov qwb qaws tsis rov mus fib tse.

Nqe 6:

Lag yau wb yuav coj neb niam pwj kub mus cob lis nkaus rau kuv niam kuv txiv coj mus kaw lis nkaus rau lub nkuaj xyoob, kaj ntug tag kis nus tij li ntsim lis npawv me nyuam pwj kub rau neb nkauj nyab nraug vauv coj rov mus yeej noob.

Lag yau wb yuav coj neb niam pwj nyiaj mus cob lis nkaus rau kuv niam kuv txiv coj mus kaw lis nkaus rau lub nkuaj phav, kaj ntug tag kis nus tij li ntsim lis npawv me nyuam pwj nyiaj rau neb nkauj nyab nraug vauv coj rov mus yeej tsav, no tis yuas neb nkawm phooj ywg kwv sis luag e!

Zaj txais Nyiaj los xaus li no. Thov kom koj siv tau. Koj mam muab kho kom raws li koj siab nyiam. Ua tsaug.

Koj xav kawm ntxiv Zaj tshoob Cob Nyiaj (Tso Nyiaj) by Keeb Yaj

- Advertisement -

Để lại bình luận

Địa chỉ email của bạn sẽ không được công bố.

Website này sử dụng Akismet để hạn chế spam. Tìm hiểu bình luận của bạn được duyệt như thế nào.