Hãy nhìn lại lối sống của bạn.

Zaj tshoob Taij Kaus by Tshaj Meej

0 37

- Advertisement -

Zaj tshoob Taij Kaus yog ib zaj keeb kwm los ntawm peb hmoob kev ua tshoob ua kos. Xis li pos ua tseg yawm ua cia, kev ua tshoob ua kos yuav tsum hais txog zaj tshoob. Zaj Taij Kaus yog zoo li hauv qab no.

Koj xav saib Zaj Tshoob Qhib Qhov Rooj Full video Zoo mloog

Nqe 1:

Hais zoo li kus! Chiv phiaj tuaj lawm yuas neb nkawm phooj ywg kwv sis luag. Lag yau wb nyob wb cuaj hnub kev deb kev sis zus, kuv niam kuv txiv tom ub li tuaj thov lag yau wb lub zog txus.

Lag yau wb nyob wb cuaj hnub kev deb kev sis zas, kuv niam kuv txiv tom ub li tuaj thov lag yau wb lub zog tas.

Nqe 2:

Lag yau wb xav tias wb tsis tuaj los ua neej nyob muaj tub yuav muab nyab, muaj ntxhais los yuav quas lag yau wb li tuaj.

Lag yau wb xav tias wb tsis leg los ua neej nyob muaj tub yuav muab nyab, muaj ntxhais los yuav quas lag yau wb li leg.

Nqe 3:

Lag yau wb tuaj txog lis ntua kuv niam kuv txiv tom ub rooj tag qab mus plaj txuas, kuv niam kuv txiv tawm lis plaws tuaj hu lag yau wb luag lis nqhuas.

Lag yau wb tuaj txog lis ntua kuv niam kuv txiv tom ub rooj tag qab mus plaj xab, kuv niam kuv txiv tawm lis plaws tuaj hu lag yau wb luag lis nyav.

Nqe 4:

Kuv niam zoo siab kuv niam sawv lis tsees los tua tsiaj, ua xwm phaj rau lag yau wb noj. Kuv niam kuv txiv tso lis plhuav nws txoj kab tshoob rau lag yau wb coj.

Kuv txiv zoo plawv kuv txiv sawv lis tsees los txo cawv, ua xwm tshuaj rau lag yau wb haus. Kuv niam kuv txiv tso lis plhuav nws txoj kev kos rau lag yau wb taug.

Nqe 5:

Kuv niam kuv txiv tub tij li muab niam nkauj kaus cob lis nkaus rau lag yau wb tej mus quav npab. Lag yau wb li yeej cuam nkauj nyab nraug vauv sawv mus ntoj kab.

Kuv niam kuv txiv tub tij li muab niam nkauj kaus cob lis nkaus rau lag yau wb tej mus quav tes. Lag yau wb li yeej cuam nkauj nyab nraug vauv sawv mus ntoj kev.

Nqe 6:

Lag yau wb tuaj txog nram dej, wb yuav pom tau wb niam nkauj kaug tus cev zam zoo ua lag yau wb ntej.

Lag yau wb tuaj txog nram hav, wb yuav pom tau wb niam nkauj kaug tus cev zam zoo lawv lag yau wb qab.

Nqe 7:

Nag hmo lag yau wb yeej cuam wb niam nkauj kaus tuaj txog kuv niam kuv txiv tsev tom no . Lag yau wb tsis pom qab cob, wb muab cob lis nkaus rau neb nkawm phooj ywg kwv sis luag tej mus quav npab. Neb coj lag yau wb niam nkauj kaus mus dai lis liag rau kuv niam kuv txiv tom no tus yees ntshab.

Nag hmo lag yau wb yeej cuam wb niam nkauj kaus tuaj txog kuv niam kuv txiv tsev tom no . Lag yau wb tsis pom qab cob, wb muab cob lis nkaus rau neb nkawm phooj ywg kwv sis luag tej mus quav tes. Neb coj lag yau wb niam nkauj kaus mus dai lis liag rau kuv niam kuv txiv tom no tus yees tsev.

Nqe 8:

Nag hmo plaj tshoob lag yau neb nrog wb muab leg ntseg, kev kos peb muab leg tiav. Kaj ntug tag kis no peb noj nqaij mus puv plab, haus cawv mus puv cev. Tav nov tav lag yau wb lub caij fij seeb nqes rov fib qab. Lag yau wb tub tsheej mus luj vim luj vim ua neb nkawm phooj ywg kwv sis luag tsaug. Neb muab wb niam nkauj kaus cob lis nkaus rau lag yau wb npab. Lag yau wb yuav roos nkauj nyab nraug vuav rov mus fib qab.

Nag hmo plaj tshoob lag yau neb nrog wb muab leg ntseg, kev kos peb muab leg tiav. Kaj ntug tag kis no peb noj nqaij mus puv plab, haus cawv mus puv cev. Tav nov tav lag yau wb lub caij fij seeb nqes rov fib tse. Lag yau wb tub tsheej mus luj vim luj vim ua neb nkawm phooj ywg kwv sis luag tsaug. Neb muab wb niam nkauj kaus cob lis nkaus rau lag yau wb tes. Lag yau wb yuav roos nkauj nyab nraug vuav rov mus fib tse, no tis yuas neb nkawm phooj ywg kwv sis luag e!

Zaj Taij Kaus los xaus li no. Ib tsoom kwv tij neej tsa saib mam muab kho raws li nej siab nyiam nawb.

Koj xav kawm ntxiv Zaj tshoob Cob Kaus by Tshaj Meej

- Advertisement -

Để lại bình luận

Địa chỉ email của bạn sẽ không được công bố.

Website này sử dụng Akismet để hạn chế spam. Tìm hiểu bình luận của bạn được duyệt như thế nào.