Hãy nhìn lại lối sống của bạn.

Zaj tshoob Cob Kaus by Tshaj Meej

0 51

- Advertisement -

Zaj tshoob Cob Kaus yog ib zaj keeb kwm los ntawm peb hmoob kev ua tshoob ua kos. Xis li pos ua tseg yawm ua cia, kev ua tshoob ua kos yuav tsum hais txog zaj tshoob. Zaj Cob Kaus yog zoo li hauv qab no nawb.

Koj xav kawm zaj Taij Kaus ntawm Zaj tshoob Taij Kaus by Tshaj Meej

Nqe 1:

Hais zoo li kus! Chiv phiaj tuaj lawm yuas neb nkawm txiv tuam mej koob lwm mej koob! Xyoo no ces kuv niam kuv txiv tus plaj tshoob ntaug los poob. Nws yuav muab tau lub kaus vej kaus vuam coj los rau neb coj mus ua kuv niam kuv txiv tus puav pheej tshoob.

Xyoo no ces kuv niam kuv txiv tus plaj kos ntsig los txog. Nws yuav muab tau lub kaus vej kaus vuam coj los rau neb coj mus ua kuv niam kuv txiv tus puav pheej kos.

Nqe 2:

Hais zoo li kus!   Kuv niam kuv txiv muab tau niam nkauj kaug cob lis nkaus rau neb txiv tuam mej koob lwm mej koob tej mus quav npab. Neb li zoo roos nkauj nyab nraug vauv sawv mus nce kab.

Kuv niam kuv txiv muab tau niam nkauj kaug cob lis nkaus rau neb txiv tuam mej koob lwm mej koob tej mus quav tes. Neb li zoo roos nkauj nyab nraug vauv sawv mus nce kev.

Nqe 3:

Hais zoo li kus!  Neb muab niam nkauj kaug roos nkauj nyab nraug vauv mus txog toj taim toj roob nqeeb es neb tsis tim qhib mog, luj hlw nees thiaj li tsis los nrog neb sib txeeb.

Neb muab niam nkauj kaug roos nkauj nyab nraug vauv mus txog tim toj es neb tsis tim qhib mog, luj hlw nees thiaj li tsis los nrog neb sib huas noj.

Nqe 4:

Hais zoo li kus!  Neb muab niam nkauj kaug roos nkauj nyab nraug vauv mus txog toj taim tom tim ub. Tshav tuaj ces tshav kub, nag los ces nag ntub. Neb nkawm txiv tuam mej koob lwm mej koob, neb tsis tim muab niam nkauj kaug nthuav los mus roos hnub.

Neb muab niam nkauj kaug roos nkauj nyab nraug vauv mus txog toj taim tom tim i. Tshav tuaj ces tshav ci, nag los ces nag tshia lis tshi. Neb nkawm txiv tuam mej koob lwm mej koob, neb tsis tim muab niam nkauj kaug nthuav los mus roos hli.

Nqe 5:

Hais zoo li kus!  Kuv niam kuv txiv yuav muab tau niam nkauj kaug rau neb coj mus ua nws tus puav pheej. Neb coj niam nkauj kaug nrog neb mus ces niam nkauj kaug tsis tshuav lawm leej twg nuj, neb coj niam nkauj kaug mus es neb li zoo mus nrog kuv niam kuv txiv tom ub ua txuj.

Kuv niam kuv txiv yuav muab tau niam nkauj kaug rau neb coj mus ua nws tus puav phav. Neb coj niam nkauj kaug nrog neb mus ces niam nkauj kaug tsis tshuav lawm leej twg nqi, neb coj niam nkauj kaug mus es neb li zoo mus nrog kuv niam kuv txiv tom ub ua ci.

Nqe 6:

Hais zoo li kus! Neb coj niam nkauj kaug mus txog lis ntua kuv niam kuv txiv tom ub tej qab mus tsev vuas. Neb yuav muab niam nkauj kaug coj mus khuam lis nkaus rau kuv niam kuv txiv tom ub tej qab mus tsev vuas. Ntshe kuv niam kuv txiv niam nkauj kaug yuav nyob niam nkauj kaug tej sis nqhuas.

Neb coj niam nkauj kaug mus txog lis ntua kuv niam kuv txiv tom ub tej qab mus tsev nqeeb. Neb yuav muab niam nkauj kaug coj mus khuam lis nkaus rau kuv niam kuv txiv tom ub tej qab mus tsev nqeeb. Ntshe kuv niam kuv txiv niam nkauj kaug yuav nyob niam nkauj kaug tej sis ntsheeb.

Nqe 7:

Hais zoo li kus!   Neb muab niam nkauj kaug coj mus khuam lis nkaus rau kuv niam kuv txiv tom ub tus yees tsev. Neb muab kuv niam kuv txiv tom ub tom no txoj kev tshoob leg mus kom ntseg, kev kos leg mus kom tiav. Kaj ntug tag kis kuv niam kuv txiv tom ub yuav yeej cuam niam nkauj kaug rau neb roos nkauj nyab nraug vauv rais lis lees rov los fib tse.

Neb muab niam nkauj kaug coj mus khuam lis nkaus rau kuv niam kuv txiv tom ub tus yees nthab. Neb muab kuv niam kuv txiv tom ub tom no txoj kev tshoob leg mus kom ntseg, kev kos leg mus kom tiav. Kaj ntug tag kis kuv niam kuv txiv tom ub yuav yeej cuam niam nkauj kaug rau neb roos nkauj nyab nraug vauv rais lis lees rov los fib qab, no tis yuas neb nkawm txiv tuam mej koob lwm mej koob e!

Zaj Txais Kaus los xaus li saum no. Ua cas los yuav tsum muaj qhov txawv ntawm koj paub. Yog li koj mam muab kho zoo li koj paub thiab nyiam.

Koj xav kawm ntxiv Zaj tshoob Txais Kaus by Tshaj Meej

- Advertisement -

Để lại bình luận

Địa chỉ email của bạn sẽ không được công bố.

Website này sử dụng Akismet để hạn chế spam. Tìm hiểu bình luận của bạn được duyệt như thế nào.